Baydhabo,(insidesomalia.org)- Xildhibaan ka Tirsanaa Baarlamaanka KMG ah ee Soomaaliya ayaa maanta xilkiisa iska Casilay, isagoo Iscasilaadiisa ku saleeyay xil gudasho la’aanta Baarlamaanka ee ku aadan la xisaabtanka Xukuumada Soomaaliya ee uu hor kacayo Ra’isul Wasaare Nuur Cadde.

Xildhibaan Axmed Max’ed Cabdi FAO oo ka mid ah Xildhibaanada Golaha Baarlamaanka Soomaaliya ayaa maanta Saxaafada u sheegay in uu iska Casilay ama uu baneeyay xilkii uu uga midka Ahaa Mudanayaasha Baarlamaanka Soomaaliya.

Waxaa uu ku sababeeyay ka tagidiisa Baarlamaanka Mr Axmed FAO in uu awoodi waayay marxaladani lagu jiro iyo Baarlamaanka oo awoodi waayay in uu daba galo Xukuumada qodobadii loo saaray iyo arimo kale.

“ Iska Casilaadeeyda Waxaa keenay Marxaladani Dalka uu ku jiro iyo weliba Baarlamaanka ayaa waxaa uu ku daba gali waayay Xukuumada arimo looga baahnaa in wax laga weeydiiyo” ayuu yiri Axmed Max’ed Cabdi FAO oo sheegayna maanta in uu ka tanaasulay ka mid ahaanshiyaha Baarlamaanka.

Xilidhibaan Axmed Max’ed Cabdi FAO ayaa waxaa uu in mudo ka mid ahaa Xildhibaada Baarlamaanka Soomaaliya isla markaana uu ku soo gudo jiray Baarlamaanka,lamana oga in ay jiraan arimo kale uu isaga casilay xilkii uu ka hayay Baarlamaanka.

Ma’ahan Markii ugu horeeysay ee Xildhibaan ka tirsan Golaha Baarlamaanka Soomaaliya uu isaga tago xilkii uu ka hayay Baarlamaanka, iyadoo Xilidhibaadii horay u baneeyay Boosaska Xildhibaanimo ay ku sababeeynayeen xaaladaha Dalka Ka jira oo ay ku shaqeeyn waayeen.